October 18 , 2006
TCB Press Release (Papiamentu)
Comments by Commissioner Dortalina (Papiamentu)

Akuerdo firmá na Hulanda aseptá unánimamente

Kralendijk – E akuerdo firmá na Hulanda relashoná ku futuro struktura estatal di nos isla, a keda aseptá unánimamente pa miembronan di konseho insular durante e reunion djamars atardi 17 di òktober.

Durante di e reunion aki a hiba palabra diputado enkargá ku struktura estatal, sr. Reginald Yonchi Dortalina.

Segun diputado Dortalina durante sinkuenta aña nos relashon ku Hulanda tabata basá riba e paradigma di deskonfiansa kontinuo. Den nos relashon diario ku hulandesnan sèmper nos ta kouteloso. Awor nos tin ku kambia e paradigma aki. Pasobra Hulanda a aseptá nos den nan pais. Boneiru, Saba i St. Eustatius ta bira parti di Hulanda.

Esaki ta enserá ku fo’i djawó nos tin ku kuminsá traha un brùg entre Boneiru i Hulanda. Anto e brùg aki yama konfiansa.

Relashon entre hende mester ta basá riba konfiansa. Si bo no por konfia otro, bo no por traha huntu. Pues, for di awe nos ta kuminsá traha e brùg nobo aki.
E por dura un tiki promé ku e ta kla, pasobra loke nos tin aworakí ta solamente fundeshi.

Mester traha e kaminda ainda ku ta span e dos fundeshinan aki na Boneiru i Hulanda. Pero nos sa kaba kiko nòmber di e brùg aki ta, segun diputado Dortalina. Su nòmber ta konfiansa i esei nos tin ku kuminsá traha riba dje fo’i djawó.

Mas aleu diputado Dortalina a bisa ku Minister Nicolaï mes a bisa bon kla ku e islanan chikitu i Hulanda por a yega na un akuerdo históriko pasobra tur e partidonan tabata dispuesto di pone ego un banda, tambe simbolismo i outonomia. Partidonan a mira i skohe loke ta mihó pa e pueblonan i rekonosé ku ta mihó traha huntu ku Hulanda.

P’esei e akuerdo ta un enrikesimentu pa tantu Hulanda komo e islanan.
Pues pa traha e kaminda di e brùg nos mester konkluí ku nos mester bandoná tur nos ideologianan opsoleto, ideanan morto i pensamentunan eróneo. Nos mester lanta fo’i soño ku un mente refreská, remplasá nos ideanan antikuá ku solushonnan pragmátiko i moderno. No pasobra nan ta moderno sino pasobra nan ta bon.

Ban saminá algun di e puntonan nobo ku a ser akordá na Hulanda últimamente.

E deklarashon final ta rekonfirmá, loke konseho di estado, Raad van State, a konsehá. Boneiru, Saba i St. Eustatius ta haña un status nobo di un karakter partikular pero den reino hulandes.

E status ‘sui generis’ aki ta duna nos isla un laso direkto ku Hulanda segun deseo di nos pueblo.

Nos pueblo a skohe pa un laso direkto ku Hulanda pero manteniendo nos kultura, nos identidat i nos kustumbernan.

Nos a skohe pa mantenshon di diversidat entre Boneiru i Hulanda kaminda ku no nesesariamente nos mester adoptá tur loke ta posibel aya na Hulanda. Nos normanan kristian mester keda respetá. Ta p’esei e status ‘sui generis’ ku ta pèrmití nos di ta otro for di e munisipionan di Hulanda.

Pa promé bia den historia Boneiru lo haña oportunidat di tene kontakto ku paisnan den eksterior. Paisnan manera Trinidad, Venezuela i Sürnam, pero tambe kontakto ku organisashonnan internashonal. Manera por ehèmpel asosashonnan di estado karibense etc.

Naturalmente esaki mester bai den konsulta estrecho ku i via di asuntunan di eksterior di Hulanda pasobra nos ta forma parti di Hulanda.

Despues di e disertashon di diputado Dortalina a pasa over pa votashon, den kua tur e miembronan di Konseho Insular a bai di akuerdo ku esaki.

Diputado Dortalina relashoná ku akuerdo firmá na Hulanda

BONEIRU LO NO PERDE SU OUTONOMIA

Kralendijk – Diputado Reginald Yonchi Dortalina den su disertashon durante di reunion di konseho insular, djamars último a mustra bon kla ku Boneiru lo no pèrdè su identidat i outonomia den e struktura nobo ku ta na kaminda.

Segun diputado Dortalina, tur esnan ku a pretendé ku Boneiru den laso direkto ku Hulanda lo pèrdè su outonomia no a haña rason. Pretu riba blanku nos tin akordá ku mas tantu posibel Boneiru mes lo keda responsabel pa su mes. Ku otro palabra, e prinsipio di outonomia lokal, a keda totalmente rekonosé.

Úniko kos ku a kambia ta ku awendia na Oropa nan ta usa e palabra supsidiaridat pa deskribí e prinsipio ei. Pasobra Hulanda ta forma parti di Oropa, nan no ta usa e palabra outonomia mas, sino e palabra supsidiaridat.

Tin bia no ta fásil, pa splika e tipo di kosnan aki pasobra nos ta islanan chikitu leu for di Oropa i ta p’esei nos no ta dje bon na altura di tur e último desaroyonan ku ta tumando lugá aya. Pero kon ku bai bin Hulanda nunka a disputá nos outonomia.

Punto di salida di e struktura nobo ta i lo keda ku mas tantu tarea posibel lo keda responsabilidat di Boneiru.

Esaki ta nifiká, kompará ku ántes, ku nos outonomia lo bira aun mas grandi i kaminda ta nesesario nos por konta ku yudansa direkto di Hulanda pa motibu ku nos lo ta forma parti di Hulanda. Un parti outónomo por sierto pero tòg un parti integral. Anto Hulanda lo no por neglishá un parti di su mes.

E paradigma nobo ta enserá tambe ku Hulanda a asumí responsabilidat pa bienestar di su propio hendenan ku awor ta inkluí nos tambe.

Nos ta ser inkluí no solamente pasobra nos tin pasaporte hulandes pero pasobra Hulanda a asumí responsabilidat kompleto pa nos bienestar.
Den e eskoho di nos laso direkto pueblo a skohe pa sali for di Antia i laga Hulanda karga e responsabilidat pa nos isla.

Esaki ta e logro di mas grandi den e dokumento ku nos a firma. Pasobra Hulanda konforme leinan internashonal lo asumí e responsabilidat kompleto pa nos bienestar. Su deber ta di kuida pa derechonan humano ku ta enserá tambe derechonan sosial i derechonan ekonómiko keda garantisá. Tambe e ta responsabel pa bon gobernashon keda garantisá.

Asina ta ku awor Boneiru, Saba ku St. Eustatius ta drenta un era nobo.
Kaminda nos lo forma parti di Hulanda. No mas komo parti di Antia den Reino Hulandes sino komo parti di Hulanda mes. Boneiru lo ta konforme artíkulo 134 di Lei Konstitushonal, un órgano públiko, un struktura hurídiko ku ta pèrmití nos di ta parti integral di Hulanda. Esaki ta trese kuné ku nos relashon ku Hulanda lo bira aun mas direkto, aun mas estrecho. Kaminda nos mester duna nos koperashon total ku Hulanda i Hulanda tambe mester duna su koperashon total pa ku nos.

Asina so nos por sigui bai dilanti. Ta p’esei a bisa ku introdukshon di e brùg entre Hulanda i Boneiru yama konfiansa, segun Dortalina.

Konfiansa den futuro, konfiansa den otro i sigur konfiansa den nos mes. Pasobra nada den mundu no ta keda realisá si bo no traha p’e. Nos por konfia sigur riba yudansa di Hulanda pero di otro banda nos tambe mester sigui traha; sigui traha pa nos mes i pa nos Boneiru por bai dilanti.

Ta p’esei ban kuminsá traha e brùg di konfiansa awor. A palabrá ku Hulanda ku pa fin di e aña aki nos mester keda kla ku e diferente leinan, diferente proyektonan pa asina di tal moda den kurso di otro aña nos por kuminsá implementá e diferente palabrashonnan i inougurá tambe e diferente institutonan nobo.

Un bia mas mi mester hala atenshon bisando aworakí ku loke nos tin ta un fundeshi i ku ta hopi trabou mester hasí ainda pa kaba e trabou kompleto, diputado Dortalina a trese dilanti.

Nos ta sigur tambe ku nos lo topa ku difikultatnan durante di e trabounan aki.
Pero ya nos a demostrá kaba ku nos ta kapas di superá kualke difikultat i ku fe den Dios nos no por faya. Pasobra si Dios ta ku nos, ken lo por stroba nos?

Diputado Dortalina a tèrminá bisando ku historia lo rekordá e Konseho Insular aki kaminda e dos lidernan di frakshon, den persona di sr. Abraham i sr. Booi, harmoniosamente na benefisio di pueblo a traha huntu pa logra loke mi ta presentá aki.