September 5 , 2006
Tourism Corporation Bonaire Press Releases (Papiamentu)

Demanda Haltu Pa Boneiru Den 2005

Kaida mínimo di turismo den 2005 apesar di kaida drástiko den airlift

Boneiru a eksperiensha den 2005 un kaida di te ku 45% den airlift for di Merka. Apesar di e desaroyo ménos positivo aki turismo a baha solamente ku 1% en komparashon ku aña 2004. Fuera di e demanda fuerte pa Boneiru, un kaida drástikoa wòrdu minimalisá den 2005 dor di un subida di 7.5% for di e merkado Europeo.

Den e promé sinku luna di 2005, turismo di estadia for di Merka a krese ku 4.5% di Yanüari te ku Mei. Esaki a konosé un kambio ora ku ariba 11 di Mei 2005, Air Jamaica a anunsiá kanselashon di tur vuelo pa Boneiru (4 pa siman) dor di problemanan finansiero ku Air Jamaica tabata pasando aden. Despues di diferente negoshashon a akordá ku Air Jamaica lo keda ku un vuelo. Ku American Eagle a akordá ku nan lo añadí dos vuelo i durante lunanan di Yüni i Ougùstùs, te ku 4 vuelo. E redukshon den asiento for di Air Jamaica a representá un redukshon den kapasidat di asiento for di Merka di 30% durante temporada di verano i di 45% durante periodo Sèptèmber 2 – Desèmber 16 2005.

Den 2005, apesar di problemanan aéreo, Boneiru a logra mantené su posishon den e merkado Merikano, ku 4.7% di turista ménos kompará ku aña 2004. Den buska pa mehorashon a sera 2005 ku introdukshon di e promé konekshon aéreo nònstòp di Continental Airlines.

Turismo di estadia for di Europa a subi ku 7.5% den 2005 kompará ku aña 2004, unda ku esaki a baha ku 3.8%. E kresementu di e merkado Europeo ta mara ku prinsipalmente desaroyo positivo den e merkado primario ku ta Ulanda i den e merkadonan sekundario. Turismo di Ulanda a subi ku 6%. Turismo for di Alemania a krese ku 10.9%, Inglatera ku 9.8%, i Scandinavia ku te ku 79.1% (Finland). Sifranan for di e merkado Europeo sigur ta reflehá un demanda fuerte pa Boneiru for di e kontinente aki.

Sur Amérika, mesun kos ku Merka, a konfrontá hopi problema aéreo den 2005, evitando asina un desaroyo positivo. Turismo for di Sur Amérika a baha ku 10.9% kompará ku e aña anterior. Turismo di estadia for di e merkado Karibense a ser impakta negativamente den 2005 dor di difikultatnan den konekshon aéreo pa bishita Boneiru for di e merkado prinsipal ku ta Aruba.

Ofisina di turismo a pone i ta sigui pone e debido atenshon na e diferente merkadonan prinsipal pa Boneiru. E enfoke ta prinsipalmente ariba área di airlift i promoshon, ku ta dos faktor di sumo importansha. Ta pronostiká ku fuera di e kondishonnan ku nos no por kontrolá den kada merkado (ku ta diferensia pa kada kontinente), ku avansenan positivo lo ser realisá den e periodo ku ta sigui 2005. Ariba e tereno aki, awor den Sèptèmber 2006, TCB ta satisfecho ku resultadonan te ku awor unda ku a mehorá e parti di kapasidat di asiento for di Merka i for di Europa. Tambe unda ku nos por wak un kresementu den e merkadonan di Sur Amérika i Karibe. Efektonan di mehorashon aéreo lo ser sinti den aña 2007, mirando ku nan lo ser introdusí Novèmber 2006 en adelante.

Kopia di e relato di aña 2005 ta optenibel na TCB. Por manda un email pa Sr. Rico Martis na asstgm@tourismbonaire.com pa optené un kopia. Kopia ta kontené konklushonnan di e diferente merkadonan i diferente presentashonnan gráfiko.

Turismo A Logra Mantene Un Posishon Bastante Stabil Den Prome 6 Luna Di 2006

No opstante ku Boneiru a eksperiensha un kaida di te ku 14% den asiento pa Boneiru for di Merka i Europa, den e promé 6 luna di aña turismo di estadia pa Boneiru a baha proporshonalmente ménos ku un total di 5.9% en komparashon ku e promé 6 luna di 2005. 32.266 turista a bishita Boneiru kompará ku 34.272 den 2005. Sur Amérika i Karibe ta mustra un subida di te ku 20%, pero no tabata sufisiente pa mehorá e sifra total.

Durante e lunanan di Yanüari te ku Yüni 2006 total di kapasidat aéreo pa transportá esnan ku kier bishita Boneiru for di Merka a baha ku 14%, esaki inkluyendo e vuelo nònstòp nobo di Continental Airlines ku a kuminsá aña pasa na Desèmber. Kompará ku e kaida aki, turismo di estadia di Merka a baha ku 4.4% durante e promé 6 luna di 2006 kompará ku e mesun periodo den 2005. Esaki tabata pues signifikantemente ménos ku e bahada den kantidat di asiento, reflehando e demanda fuerte for di Merka i esfuersonan di promoshon ku ta presente den e merkado aki. Esfuersonan pa mehorá e situashon ta kanando positivamente, ku introdukshon di un segundo vuelo nònstòp dor di Continental Airlines, for di e region Nort Este ku histórikamente ta e parti mas importante pa Boneiru. Fuera di esaki mirando e éksito di e vuelo nònstòp di Houston, Continental Airlines ta ekspandiendo e kapasidat durante e temporada haltu ku ta na kaminda.

Un subida den e demanda pa Lima i Quito a trese komo konsekuensia ku kantidat di asiento ariba KLM destiná pa Boneiru a baha i ku tarifa di ticket pa Boneiru a subi drástikamente i ta signifikantemente mas haltu ku otro destinashonnan bisiña. Promé 6 luna den 2006 ta mustra un bahada di 11.2% bou di turismo di estadia for di Europa. Esfuersonan pa brinda mas asiento for di Europa a resultá den introdukshon di Arke Fly desde Novèmber e aña aki.

Turismo di estadia for di Sur Amérika i Karibe al kontrario a mustra un subida den promé 6 luna di 2006. For di Sur Amérika por nota un subida di kasi 20% kompará ku mesun periodo aña pasa. E subida ta primordialmente danki na desaroyo di e merkado Brasilero, ku ta brinda hopi potensial pa Boneiru i ariba kual TCB ta poniendo èkstra atenshon desde aña pasa. Esaki ku éksito. For di Karibe, Boneiru a risibí 13.7% mas turista kompará ku e mesun periodo aña pasa, unda bishitantenan di Aruba a subi ku 13.9% i unda ku for di restante di Karibe Boneiru a risibí 12.8% mas bishitante.

E faktor di airlift ta keda hunga un ròl importante pa logra un desaroyo positivo. Ofisina di turismo ta keda pone e debido atenshon pa mehorá esaki i ta satisfecho ku resultadonan positivo ku ta ser logra a korto plaso. Fuera di esaki lo sigui reforsá promoshonnan den eksterior pa mantené i pusha demanda pa Boneiru.

Kopia di e relato di promé mitar di aña 2006 ta optenibel na TCB. Por manda un email pa Sr. Rico Martis na asstgm@tourismbonaire.com pa optené un kopia. Kopia ta kontené konklushonnan di e diferente merkadonan i diferente presentashonnan gráfiko.